Гревот е прекршување на Законите дадени од Бога. Бог не ни ги даде тие закони бесцелно или затоа што Он сакал да се мачиме, но ни ги даде затоа што тие закони се закони на постоењето на Неговото битие. На тој начин, ако ги исполнуваме Неговите заповеди, нашето битие ќе стане слично на Неговото, и со тоа ќе ја исполниме целта на нашето постоење - да станеме Богоподобни, во мера во колку што можат да бидат луѓето слични на Бога.

Бог е љубов (1. Јов. 4, 16). Затоа ние со ништо не можеме да Го навредиме, разгневиме и повредиме ако направиме грев. Бог е постојано тука и постојано чека да Му ги отвориме вратите на нашите срца. Со правењето на грев Он не се оддалечува од нас, туку ние од Него. Затоа гревот ни наштетува само нам, затоа што ја одбираме темнината и правејќи дела кои ни ги внушува демонот и ние стануваме како него. Ако правиме дела кои ни се заповедани од Бога, стануваме слични на Него. Затоа, кога правиме грев, пред сè да знаеме дека ние на себе сме си направиле штета, а не на Бог. Како што е кажано погоре, Бог е Љубов и Он го чека нашето покајание. Кога ние ќе се обратиме кон Него како мало беспомошно дете кон својата мајка, Он ќе ни ги прости гревовите и ќе ни помогне во тешката борба против истите. Првиот чекор во почнување на таа борба е согледување на гревовите и покајание. Вториот чекор е исповедта, а круна на овој процес е Светата Причест, преку Која стануваме дел од Христа и ја добиваме Божјата благодат која ни е потребна за победа над гревовите, живеење според заповедите со што ќе станеме дел од Бога и ќе го постигнеме вечното спасение кое е апсолутна цел на нашиот живот.

#Православие #ПравославнаВера #ГревИСпасение #Покајание #Исповед #СветаПричест #БогЕЉубов #ИсточнаПравославие #ПравославниУченија #ВераИДела #ХристијанскаПравославие #ЖивотВоХристос #ПравославнаМудрост #ВечноСпасение